දවසක් එයා ගිහිං තියෙනවා ටිකක් දුර එයාලගේ නෑදෑ කෙනෙක්ගේ ගෙදර. ටිකක් පරණ තට්ටු දෙකේ ගෙයක්. එයාලට කලින් එහේ වෙන කට්ටියක් ඉඳලත් තියෙනවා.
ඉතිං මගේ යාළුවා මෙහෙ ගිහිං එහෙ ඉන්න නංගිලා දෙන්නා එක්ක ගිහිං තියෙනවා උඩ තට්ටුවේ එයාලගේ නිදාගන්න කාමරේට. එයාලගේ තව යාලු කෙල්ලෙකුත් එවෙලේ ඉඳල තියෙනව. කෙල්ලෝ ටික දැන් රෑ අර කාමරේ ඇඳ උඩ සෙට් වෙලා කයියක් ගහ ගහ ඉන්නවලු.
මේ කාමරේ එක බිත්තියක් අයිනෙලු ඇඳ තියෙන්නේ. ඒ කෙලින් එහා පැත්තෙ බිත්තියේ තමයිලු ජනෙල් තියෙන්නෙ. මෙතැනදී මම අඳුරන කෙල්ල විතරයි ඇඳ උඩ වාඩි වුනහම ජනේලේ පේන විදියට ඉඳගෙන ඉඳලා තියෙන්නේ.
ටික වෙලාවකින් මෙයාට පේනවලු පොඩි කොල්ලෙක්ගේ චායාවක් ජනේලෙන් ඇතුල බලං ඉන්නවා. හැබැයි මුණ පැහැදිලි නෑලු. කලුපාට චායාවක් තමයිලු පේන්නේ. ඌ එබෙනවලු, පහත් වෙනවලු පැත්තෙන් එබෙනවලු යටින් එබෙනවලු. මෙයා ඉස්සෙල්ලා ගණන් අරගෙන නෑ. හිතල තියෙන්නේ ගෙදර පොඩි එකා උඩ බැල්කනිය දිගේ ඇවිල්ලා අක්කලාගේ කාමරේට එබෙනවා කියලා මුගේ ඇට්ටර කමට.
පස්සේ මේක මහ වාතයක් වේගෙන එන නිසාත් අනික කෙල්ලො ටිකක් ඉන්න කාමරයක් නිසා චාටර් හින්දා මෙයා ජනේලෙට පිටුපාල හිටපු අනිත් එවුන් ටිකට කිව්වලු "අර කව්ද පොඩි කොල්ලෙක් ජනේලෙන් එබෙනවා සැරින් සැරේ කියලා.
මොකෙද්ද කියල බලන්න අනිත් කෙල්ලෝ ටික ජනේලේ පැත්ත හැරෙනකොටම මු ටකස් ගාල හැන්ගෙනවලු. මෙහෙම දෙතුන් පාරක්ම වෙලා තියෙනවා. අනිත් එවුන් බනිනවලු මේකිට පිස්සු කියලා.
පස්සෙ ආයෙත් අරූ ජනේලෙන් එබුන ගමන් මේ කෙල්ල දඩ බඩ ගාලා ඇඳෙන් පැනලා දිව්වලු ජනේලේ ගාවට අරූ බැල්කනියේ හැංගිලා ඉන්නවනං පට ගාලා අල්ලගන්න.
ජනේලේ ගාවට ගිහිං බැලුව ගමන් මේකිගේ තොලකට වේලිලා ගිහිං ඇඟේ මයිල් කෙලින් වුනාලු.
මොන බැල්කනිද. ජනේලෙන් එළියට බැස්සොත් කෙලින්ම උඩ තට්ටුවේ ඉඳන් පල්ලෙහාටලු. මෙලෝ බැල්කනියක් නෑලු.
කෙල්ලෝ ටික පණ එපා කියල දිව්වලු පහලට. මගේ යාලුවත් ආයෙ නෙවේලු ඒ නෑදෑය බලන්න ගියේ.
ඔය කතාව මම ඔය භූත සීන් දන්න තව එකෙක්ට කිව්වම ඌ කිව්වා එහෙම එකෙක් ඉන්නවලු මට්ට කොල්ලා කියල. කෙල්ලොන්ට පේන පොඩි ඇට්ටර කොල්ලෙක්.
No comments:
Post a Comment